په ننګرهار کې د طالبانو حکومت ځايي چارواکي وايي، تورخم کې د طالب او پاکستاني ځواکونو له نښتې وروسته پنج شنبه (د وړی ۱۶مه) دویمه ورځ هم د تګ راتګ لاره تړلې ده.
د انصار خبرګزاری د راپور لمخی په سیمه کې طالب چارواکو بي بي سي ته ویلي، له پرونۍ نښتې وروسته ډزې نه دي شوې خو "د خلکو او موټرو پر مخ لاره لا هم بنده ده."
د ننګرهار د اطلاعاتو او کلتور چارواکي قریشي بدلون بي بي سي پښتو ته وویل "تورخم کې اوس وضعیت عادي دی، البته د بار وړونکو موټرو او مسافر پر مخ لاره لا هم تړل شوې. د پاکستان له لوري مسافرو او ټرانزیټ ته اجازه نه ورکول کېږي."
د ننګرهار د پولیسو یو چارواکی وايي، د لارې خلاصون او د ستونزې د حل لپاره "د مشرانو تر منځ خبرې روانې دي."
خو دا نه په ډاګه کوي چې دا خبرې د کومې کچې چارواکو ترمنځ او په کوم ځای کې روانې دي.
د تورخم دواړو غاړو ته سلګونه کسان او د ټرانزیټ یا سوداګرۍ لویې لارۍ ولاړ دي. په مسافرو کې ګڼ شمېر ناروغان هم دي چې پښتونخوا او نورو ځایونو ته د درملنې لپاره ځي.
که څه هم طالب چارواکي د مرګژوبلې په اړه له څه ویلو ډډه کوي خو د طالبانو د حکومت یوه ځايي چارواکي پرون د نوم نه ښودلو په شرط بي بي سي ته ویلي وو چې دوه کسان د پاکستاني ځواکونو په ډزو کې وژل شوي دي. د دغې سرچینې په وینا، وژل شویو کې یو موټر چلوونکی او بل طالب سرتېری شامل دي. د طالبانو د کورنیو چارو وزارت په یوه خبر پاڼه کې ویلي وو، "یاده نښته د پاکستاني پوځیانو لخوا پر افغان ځواکونو د ډزو له پیلولو سره رامنځته شوه چې افغان ځواکونو د پاکستان بريد ته ځوابي غبرګون وښود او نښته وشوه." تورخم د پاکستان او افغانستان ترمنځ د تلو را تلو تر څنګ د سوداګرۍ او ټرانزيټ خورا مهمه لار بلل کېږي. پر دې کرښه د طالب ځواکونو او پاکستاني سرتېرو ترمنځ د بېلا بېلو لاملونو له کبله پخوا هم نښتې شوې دي. اوس روښانه نه ده چې پر ډیورنډ کرښه د تلو راتلو دغه مهمه لار به کله بېرته پرانیستل شي.
URL تعقيب: https://www.ansarpress.com/pashto/26872
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني